Turkistandik_akin
Досымды жігерлендірген жырым
Көше бойлап келе жатып жүрісімнен тосылдым,
Жабырқаулы бара жатқан түрін көріп досымның,
Мен бір түрлі шошындым.
Сәлемдесіп, сонан соң жақын барып қасына,
Дедім былай досыма:
Неге бүгін көңіл-күйің жоқ сенің?
Қабағыңа қар жауып, көрініп тұр езілгені өкшенің,
Жан-дүниең жарық от қой, өшкен шағың осы ма?
Дегенім сол, ол да былай түсіндіре бастады:
Соңғы кезде өмір маған шапағатын шашпады.
Армандарым асуынан аспады.
Қадамдарым сәтсіз шығып, ілгеріге баспады.
Мақсатыма жетем деп ем,
Ол да мені орта жолдан лақтырды да тастады.
Жігерім де таудай еді,
Кесек болып кетті кенет тауларымның тастары.
Қақтым қанша, күттім қанша,
Берекенің есіктері бірақ маған ашпады.
Ізгілікпен арамызды өмір солай айырды.
Күйреп жатқан күйімді, жайрап жатқан жайымды,
Саған айтпай кімге айтам, досымсың ғой байырғы.
Деп ол жауап қайырды.
Қайырды да қарап қалды айтар сөзі біткендей,
Күш беретін менен сөздер күткендей.
Содан кейін сөйледім жағып сенім алауын,
Тағдырына бақытының бір жалауын тіккендей.
Биік еді талғамың, бейшара боп калмағын,
Қаншалықты көтерсең де қиындықтың салмағын.
Күндердің бір күнінде, бәлкім келер бүгінде,
Мақсат үшін қанатыңды қағудан сен талмағын.
Түсіндіріп бұл өмірдің бар мәнін,
Түсіндіріп осылардан оның сабақ алғанын.
Әңгімелеп бердім де, үйге келіп қағазға,
Жыр қып жаздым қалғанын.
Ойда сансыз сұрақтар!!!
Ей,ақындар осындайда өлеңменен сыр ақтар.
Өмір деген күтіп тұрған мақсаттар мен мұраттар.
Өмір деген өзен сынды уақытымен жарысқан.
Бәрі түгел көрінеді, көз тастасаң ақыл дейтін ғарыштан.
Шауып жүрген шибөрі мен құлап жатқан арыстан.
Жолы болған ақымақ пен жылап жатқан данышпан.
Ғұлама көп ауыр-ауыр қасіретпен танысқан.
Жігіттер де аз емес-ау өліп кеткен намыстан.
Ақындар бар шындық үшін құлазыған, шалынған.
Қамалдар бар алынған.
Тәкаппар бар кез келгенде басқаларға жалынған.
Ғашықтар бар күте-күте сағыныштан сарылған.
Жақсылар бар жамандыққа малынған.
Талантсыз бар ел-жұртына танылған.
Қыздар да бар артық болған сан ұлдан.
Батырлар бар дәрменсізден жеңіліп, жүрісінен жаңылған.
Таңда мейлі тарам-тарам жолдарыңның төтесін.
Жолдарыңа тағдыр кілем төсесін.
Рухсызданып жүрегің, табылмаса жігерің,
Арманыңа аңсаған тек түсіңде жетесің.
Талпынатын жандардан бол жоқтан барды шығарған.
Талғамың да биік болсын,
Биіктерді бағындырған өнеге ал ұлардан.
Бәрі бірден бола бермес,
Тұрып-тұрып уақытында топырақ та құнарған.
Шын шыдаммен күте білсең,
Сен аңсаған, ел аңсаған орындалар ұлы арман!!!
